流心朱古力蛋糕

自從有左Panasonic(NB-H3200)呢部焗爐，我幾乎每日都做麵包甜品，我真心覺得好好用，最主要係可以上下火獨立控溫(70°C - 230°C)，熱風對流，麵糰發酵，旋轉燒烤... 因為焗爐本身傳熱好快，熱度平均，功能又明確，所以好易就會上手，值得推介！



**個人意見：始終係新機，起初要自行測試會唔會有溫差，可以放一個入爐用嘅溫度計，測試溫速和溫度；同埋係預熱嘅時候，溫度要較高少少，因為打開焗爐放入食物時，會令溫度下降，影響食物質素，當放入食物後先轉回所需要嘅溫度^^ 當了解左自己嘅焗爐後，我焗呢個流心蛋糕都只係用左十幾分鐘就完成 

 (10個紙杯蛋糕分量)

流心材料: 牛奶朱古力150g，牛奶20ml
 
蛋糕材料: 蛋3隻，糖70g，鹽3g，牛奶40ml，低根面粉75g

1. 流心材料的朱古力和牛奶用小火煮至溶化，一邊煮一邊拌勻，熄火等朱古力稍涼
 
2. 朱古力倒入保鮮袋中，盡量推進一邊，形成長條型，放入冰箱急凍至硬身，大約要30分鐘，攞出來就切粒，約2cm大小，備用
 
3. 預熱焗爐上下火180度

 
4. 蛋，糖，鹽用電動打蛋器打至均勻起泡, 用手指沾上粉漿，液體能痴住手指3秒先慢慢滴返落來咁就可以
 
5. 加入牛奶用手動打蛋器拌勻，再篩入面粉，要輕輕力咁將面粉拌勻
 
6. 粉漿倒入紙杯，大約1/3嘅高度，入爐中層先焗2分鐘，只要表面略為凝固
 
7. 攞烤盤出來，將朱古力加入係紙杯中間，再將剩餘粉漿覆蓋上朱古力面和周圍，入爐焗12分鐘就完成啦！趁熱享用呵


 
**朱古力方面，可自選黑朱古力，因為小朋友唔愛苦味，所以我就全用牛奶朱古力
 
**即時食就會係流心，如果第二日食就係軟心， 因為朱古力加過牛奶去煮，就唔會變返硬身