泰式萬用酸辣汁

過兩日朋友來我屋企，指明要食泰國菜🍻
喂！其實我唔係泰國人，我都想有人煮正宗泰國菜比我食😆
仲話一定要食我呢個汁，所以今日我就整定個汁啦🤤
然後發現...我啲口水流到成地都係.....😂

話明係萬用，即係煮又得，涼拌又得，用來點生蝦刺身就最好味啦！
諗起都吞哂口水，自家製味道隨個人口味調配，入面嘅材料，
一般東南亞或九龍城嘅泰國店舖買到，而我就係荃灣楊屋道市政街市二樓...
實際我唔知幾多號舖😂 有位泰國姨姨嘅，就係果度買齊料👍

泰式香茅雞翼

呢款雞翼實在太吸引啦😍 我相信身體係最誠實，廚房外嘅人不停叫"好香呀好香呀"，仲要入來偷食😅🍗 佢地已經唔可以再等我影相，我唯有另外拿一盤去自拍😜
今次嘅雞翼我醃左兩晚...事實係...我唔記得左有包雞翼係雪櫃...所以味道超入味😋 大家都可以試試醃定兩晚後食呀👍

冬蔭功

一直都想出呢個食譜，原來一直都未出 😂 因為我成日煲，就以為自己已經post左 😁 講返呢個湯底，絕對飲完唔口渴嘅自家湯底來嘅 👍 飲完一碗又一碗！我買左兩個雞胸連雞殼，起左啲雞肉攪碎就用來炒泰式肉碎生菜包，兩食！雞殼蝦殼就用來滾湯，真係好得架 ❤
仲有，我唔鐘意一路飲湯一路吐返啲渣出來，所以我滾湯時已落齊香料，煲好就隔渣，成煲湯啖啖肉咁食，滋味好多架 👍

泰式牛肉沙律

開party，呢個係朋友要求一定要食嘅！
哈哈哈！果然係好快就清左碟啦！個味道太開胃啦！
我主要用返生蝦汁，再略為添味，就完成啦！