香辣肉腸茄汁炒意粉

好耐冇煮過飯啦！但仍然唔想煮飯喎……咁煮意粉啦！
用左係愉景灣買返來嘅肉腸來炒意粉，味道真係好夾呀！
好好食呵！

材料：
意粉
蒜頭
車里茄
肉腸 (分量隨意)
 
調味：
茄膏2湯匙
辣味香草
鹽少少
糖少少

1. 煲滾水，落少少橄欖油和鹽，烚意粉至軟身，留一碗烚意粉嘅水，

其餘啲水倒走，意粉放上筲箕上備用
 
2. 蒜頭切片，橄欖油落鑊，將蒜片煎至金黃色至脆身，攞起備用
 
3. 肉腸切片，原鑊落肉腸和車里茄，炒香後就放茄膏，落大約5湯匙烚意粉水，
煮溶茄膏，再落辣味香草，加鹽和糖作調味
 
4. 放意粉入去炒至均勻上色，最後加蒜片係面 
(如果有羅勒就加少少更好食呀！) 咁就完成啦！



**我只係用左一個煲來煮呢個意粉，原煲直接上枱，慳返啲洗碗時間~ 嘻！30分鐘內就完成！
 
**呢個係屬於冇汁嘅意粉，口感就唔會咁漏，夏天總想食啲清爽嘅野嘛，
用少少辣粉來炒，真係開胃啲
 
**我用嘅係獨子蒜，所以切出來同蒜頭不一樣呵^^
 
**除左腸，可以用煙肉，火腿，菇菌類都好味道
 
**我鐘意用茄膏來煮意粉，一來帶酸味，二來上色比較靚，係快速之選！