2015年4月21日 星期二

醃酸梅‬


呢樽係我今年做嘅最後一轉青梅啦~醃法係街市婆婆愛心教導嘅……
搞左我兩星期,終於入得樽等收成啦
 
酸梅可以做嘅餸超多呢…酸梅麵豉蒸排骨,酸梅蒸鯇魚,炆梅子雞,

甚至咕嚕肉個汁都可以用一粒來吊味……仲有太多啦!數唔哂!
如果我今次醃得成功,下年要大量啲做,三個月就可以試味,

到時同大家分享下結果啦~~





材料:青梅,糖(砂糖或原糖),粗鹽大量




1. 先將青梅洗乾淨,去頂

2. 用粗鹽搓乾淨青梅(以上兩個步驟同做梅子酒或醋一樣)

3. 放青梅係盤,用粗鹽撈勻,要每一粒梅都沾到鹽,放多啲鹽都唔怕

4. 等三日,呢三日每日都要撈勻啲梅一次,比啲鹽和梅均勻啲(呢個動作係比啲梅脫水)

5. 三日後,倒走已經脫出來嘅水,但唔好用水洗,直接再用鹽重複撈勻,等青梅再次脫水,又等三日……

6. ……重複做3~4次,會睇到啲梅變左皺皮,摸上去實實地咁就最好,但有啲梅可能熟左就會比較林身,唔緊要,最後入樽時放最面就得

7. 之後就倒走哂啲鹽水,抹乾青梅,要完全風乾冇水分,之後就可以準備入樽

8. 樽一定要消毒乾淨,最底先放一層糖,再放梅,如此類推,最面都要舖一層糖,唔好用蓋封實,用布或廚房紙包住就得,要有空氣流通

9. 等大約5日,其間要搖動下個樽或搞下啲梅,等啲糖均勻地溶解,小心唔好整爛啲梅!等糖溶哂,呢轉糖水要倒走佢,因為會苦苦地,呢個時候攞一粒梅試味,如果有好少嘅苦味就可以以下步驟,但如果仲係好苦,就要重複做多次浸糖水!

10. 我用左另一個已消毒嘅樽,轉呢啲梅入去,放一層糖一層梅,最上層舖好糖之後,係糖上面舖上粗鹽,大約舖半寸厚,目的係怕梅會發酵變成酒,所以要放鹽!跟住放3個月就可以食啦!


食用感想:
我覺得其實唔需要醃3個月咁多,因為醃左兩個月時我已經攞左幾粒出來做實驗,我覺得醃2個月嘅梅更好食,多肉和水份多啲,而醃左3個月嘅梅比較乾身和多啲皺紋,雖然味道都一樣 (咁酸...哈哈!) 所以就要睇個人選擇啦!


***當夠日子時就分開梅子和梅子汁來存放,啲梅汁記住唔好掉,係超有用!可以用來沖水飲,又可以加"7喜"就好似咸檸7咁,整咕嚕肉時做調味,或做涼拌時嘅醬料...等等....太多,數之不盡!

沒有留言:

張貼留言