紙包塔香鹽焗蝦

啲蝦好靚，真係忍唔住買，咁新鮮嘅蝦平時我會用蒜蓉開邊蒸，
不過今晚食西式，就用鹽焗啦！
加埋九層塔嘅香氣，簡單又好食！

紅醬 (番茄醬料)

為左我啲意粉BB，今早就專登做左個紅醬來配合佢，
亦係兩個仔至愛嘅茄汁添 😍😍 巧味道！

黑椒薯仔豬仔脾

用簡單嘅醃料和材料，就可以做到一個30分鐘內惹味嘅餸
 
PS：因為知道今日去街，所以我昨晚醃定左啲豬仔脾^^

( ( 好多人都問邊度買到豬仔脾，其實街市好多凍肉舖都買得到架，不過通常一排骨咁包到實哂，真係唔太顯眼，又有時候放係店入面果啲雪櫃度，要問檔主先攞出來賣，所以最好係問一問檔主就最好啦！ ) )

酸梅麵豉茶樹菇蒸排骨

上星期睇到Gigi姐嘅節目整左呢個排骨，
我先醒起我有包茶樹菇，係朋友由雲南帶比我嘅手信，
好香，平時都唔捨得食 😁 
酸梅麵豉排骨就成日食，但第一次加入茶樹菇，
真係好好食呀！

PS：我4月時醃左嘅酸梅真係超好食，下年要大量製造先得呀 

百香芒果芝士凍餅 (免焗)

夏天最好就係食百香果和芒果，兩種生果都係我嘅至愛，
加埋一齊整個甜...味道超夾！只可以講....超級無敵咁好食！
整好都冇24小時，極速沽清！我屋企3隻果然係化骨龍呀！

泰式牛肉沙律

開party，呢個係朋友要求一定要食嘅！
哈哈哈！果然係好快就清左碟啦！個味道太開胃啦！
我主要用返生蝦汁，再略為添味，就完成啦！

 

泰式帶子刺身

生蝦就食得多，轉下用帶子！好好食呀！
加埋啲泰式酸辣汁，令胃口大開呀！

流心朱古力蛋糕

自從有左Panasonic(NB-H3200)呢部焗爐，我幾乎每日都做麵包甜品，我真心覺得好好用，最主要係可以上下火獨立控溫(70°C - 230°C)，熱風對流，麵糰發酵，旋轉燒烤... 因為焗爐本身傳熱好快，熱度平均，功能又明確，所以好易就會上手，值得推介！



**個人意見：始終係新機，起初要自行測試會唔會有溫差，可以放一個入爐用嘅溫度計，測試溫速和溫度；同埋係預熱嘅時候，溫度要較高少少，因為打開焗爐放入食物時，會令溫度下降，影響食物質素，當放入食物後先轉回所需要嘅溫度^^ 當了解左自己嘅焗爐後，我焗呢個流心蛋糕都只係用左十幾分鐘就完成 

威靈頓牛柳

 

每次有朋友來食飯，都必叫我做呢個牛柳^^

因為真係好好食，完全出得廳堂架！

我已經整過好多次， 最好食係一定要用牛柳，

因為焗完肉質仍然好嫩好Juicy！

一班朋友食係最開心^^

 

蠔油鴨舌

呢個可以凍食或熱食，一樣咁好食！

加罐啤酒，煲下劇，睇下波，真係一磅都唔夠食，

我之前整過麻辣味，醉酒味，

不過我覺得最好食都係蠔油味^^

脆炸玉子豆腐

用左自家製嘅新鮮豆漿，加幾隻蛋，蒸一蒸～
就成為滑嘟嘟嘅玉子豆腐啦！
玉子係我兩個仔嘅大愛，
其實有好多煮法，番茄炒，豬肉卷，打邊爐……
直頭可以當豆腐咁煮！
外面買到現成一條條果啲，一睇個成份表…
總係令人有啲不安，都係自己整安心啲，
配埋蘋果醋汁，真係好好食，味蕾大開！

 

香煎咸蛋蠔仔餅

平時出街食飯，我老闆最鐘意叫蠔餅，
雖然我都好鐘意食，但好多時第二日都會肚痛 ><"
既然你咁想食.....今晚就蠔比你啦！
加左自家製嘅咸蛋，另有一份咸香嘅味道，超正呀！

***蠔仔去腥有辦法：記住唔好預先出水，因為會失去左果份鮮味，

只要用鮮奶浸一陣，鮮奶亦會令蠔更乾淨架！

(可以用啲過左期嘅奶，只要未變酸就可以用)

  

京蔥肉絲 配 叉子燒餅

我記得細個果時老豆成日帶我去灣仔某間菜館，
裡面嘅叉子燒餅超好食，香口野係小朋友都愛，
而家好似失傳左咁，通常食到嘅都係扁扁平平，
要自己打開塞肉入去食，已經唔係脹卜卜，
有個洞直接放肉入去，今日我成功左啦！
等我整幾個帶去娘家比老豆試下先得！
 
PS：最後先發現原來冇哂白芝麻，就用黑芝麻頂上啦！

鹽麴黑椒牛脷

突然好想食鐵板燒嘅牛脷呀！
只需要燒一邊，灑上蔥粒就食得，
呢個係我至愛嘅煎pan，真係愛不釋手呀！
有支好靚嘅巴黎鐵塔手柄外，佢嘅功能係超強，
出名唔痴底，原pan上超美觀！
 
 PS：我係惠康無意中發現有呢包未經煮熟嘅急凍牛脷，已經去左衣切好片，完全啱哂突然為食嘅我！

自家製~ 醬油麴，鹽麴 (食譜在此)

咖哩炒蟹

其實炒蟹唔難，只要克服唔好怕咁生猛嘅蟹就得！哈哈！
希望我拍嘅短片都幫到大家！
扎蟹條繩千萬唔好剪走，佢地嘅鉗好大力，真係比佢鉗到手指都冇！
最好係KO左佢先攞走，蟹肚向上，佢就會動彈不得，帶上手套可以開工！

清湯蘿蔔牛腩

呢個簡直係一個不敗嘅餸，好味又多用途^^
本來我係用坑腩，但檔主同我講，
炆清湯不如試下呢個“梅頭腩”，好食過坑腩，
肥膏和筋位都好均勻，講到咁我當然買啦！
果然！冇介紹錯！真係好好食！
但我仍覺得崩沙腩，坑腩，梅頭腩都係同級，一樣咁好食！ 
不過我日後會多個選擇！

PS：我強烈建議炆湯腩要整多啲，可以分到幾餐食，送飯送麵都一流！
個湯頭又會好飲啲！

材料：
梅頭牛腩(買左150蚊)
蘿蔔1條
雞湯300ml
冰糖20g

料頭：
蒜頭6粒
薑片5片
蔥3條

茶葉袋：
花椒1湯匙
八角2粒
桂皮1支

(花椒八角會浮面，又會痴住蘿蔔牛腩，懶人方法免得隔渣，
可以利用茶葉袋，係12蚊店可以買到！)

1. 先將牛腩出水5分鐘，清洗乾淨，切開2~3份；蘿蔔去皮滾刀切件備用
 
2. 將料頭拍鬆，落油爆香，落雞湯和熱水(一比一)
 
3. 水滾後，放入牛腩，茶葉袋和冰糖，如發現水冇覆蓋牛腩，
可補加入熱水，中火煲30分鐘，熄火，加蓋焗30分鐘
 
4. 之後再煲翻滾，中火煲30分鐘，跟住就加入蘿蔔，蘿蔔煮至軟，牛腩用筷子插入，
如果容易插入就表示炆好，加鹽作調味，跟住熄火，加蓋焗住
 
5. 待涼後，牛腩攞出來切件，或先放雪櫃30分鐘，咁會切得靚啲
 
6. 食前煲返熱，放牛腩入去浸返熱，咁就可以上碟啦！

**雞湯唔好落咁多，300ml內，純粹用來吊味，亦可以轉用牛肉清湯
 
**今日用左個湯煮烏冬，加埋牛腩蘿蔔，辣菜脯(食譜)，超好食呀

**如果有壓力煲或高速煲，就煮得更快，但我冇，就煲下焗下咁去炆，又會慳火啲

自家足料魚肉碗仔翅

相信碗仔翅係屬於香港人嘅共同回憶吧！
我用左半隻雞去餚湯底，淨係啖湯已經夠好味啦~
加埋自己整嘅辣菜脯，簡直冇得頂呀！
辣菜脯食譜在此
 

自家勁辣蝦皮菜脯

屋企必備嘅菜脯，送面送粥一流！

之前我整麻辣，今次整正常辣菜脯，不過係加辣~~ 

因為食面時浸左落啲湯度啲辣會淡左，

所以加辣都可以接受嘅！
我炒呢一批菜脯之前，我用呢個鑊來炸豬油，

咁我就直接用左呢啲豬油來炒菜脯，

所以係...超級好食！哈哈

香辣肉腸茄汁炒意粉

好耐冇煮過飯啦！但仍然唔想煮飯喎……咁煮意粉啦！
用左係愉景灣買返來嘅肉腸來炒意粉，味道真係好夾呀！
好好食呵！

醃酸梅‬

呢樽係我今年做嘅最後一轉青梅啦～醃法係街市婆婆愛心教導嘅……
搞左我兩星期，終於入得樽等收成啦！
 
酸梅可以做嘅餸超多呢…酸梅麵豉蒸排骨，酸梅蒸鯇魚，炆梅子雞，
甚至咕嚕肉個汁都可以用一粒來吊味……仲有太多啦！數唔哂！
如果我今次醃得成功，下年要大量啲做，三個月就可以試味，
到時同大家分享下結果啦~~

材料：青梅，糖（砂糖或原糖），粗鹽大量

德國咸豬手

屋企嘅雪櫃必備有急凍豬手&啤酒，今日就來清清雪櫃吧！
我未去過德國，唔知正宗嘅豬手係咩味道，不過應該都離不開脆卜卜嘅皮啦
哇！真係好脆，要趁熱食啦！