2018年4月12日 星期四

親子周末好去處 - 與哥哥的第一次



平時湊住兩個小朋友,好多時都要諗周末好去處或者假期好去處,啱啱呢個周末就同哥哥去左黑暗中對話,行我地嘅第一次黑暗之旅 💕 其實起初我真係好擔心佢會大喊大叫話要走,完成唔到旅程,不過最後我發現小朋友適應力真係好強,好獨立,好有主見 👍 入黑唔夠十分鐘,佢已經想甩開我自己周圍走,仲全程由佢照顧我,真係令我有啲驚訝😘
































今次其實係我第二次接觸「黑暗中對話」,上次係黑暗中坐低食飯(Dinner in the Dark),比較上輕易。但今次係一個完全唔同嘅體驗,哥哥今年6歲。我地手拖住手入黑👣👣雖然我地平時都係咁拖住行,不過當係黑暗又陌生嘅環境下,大人小朋友都唔多唔小會緊張!兩個人,由我攞住一支白杖開始旅程,我感覺到佢拖住我隻手比平時實好多,而一開始我已經同佢講左裏面好黑好黑....黑到咩都見唔到,要拖住媽媽呀!

但當我地行完第一個場景之後,佢已經習慣晒,想甩開我隻手自已行 😂 其中一個令我最難忘嘅場景係過馬路,聰明嘅哥哥,聽到馬路提示聲音,佢教我「滴得快就過得馬路,滴得慢唔過得!」(原來佢平時响街佢有留意架 👍) 然後,佢就帶住我黑暗中過馬路,佢仲話隻腳踩到啲粒粒,即係過完馬路啦!哥哥果然係一個暖男😍






去到最後一站,哥哥買左包檸檬茶比我,佢親自細心摸索下插埋支飲管比我飲,好窩心,因為佢知
我愛飲檸檬茶,最後導賞員同我地分享佢嘅失明經歷,令哥哥好奇萬分,仲話以後見到佢地一定會帶佢地過馬路 😁 之後比左卡和筆我地互相寫下情深說話,我寫都OK,但叫一位小朋友黑暗中寫字,的確有啲難度...唔知佢會寫乜野呢,寫乜都好....呢句說話永遠在我心中!









雖然黑暗旅程有成75分鐘,但一啲都唔覺得長,今次體驗令我感覺到哥哥純真又可愛嘅一面。其實我地比小朋友體驗多啲,關心有需要嘅人,體諒他人真係十分合適,我知好多野佢都明白,只係未搵到機會比佢發揮出來,而呢啲體驗就會令佢不知不覺長大,呢個係一個十分珍貴嘅回憶 😌
PS:弟弟未夠5歲所以冇得入去體驗,就由爸爸帶佢出去走走等我同哥哥啦!等佢夠年齡我都會帶弟弟體驗一下



💪
如果大家都有興趣一齊參加呢個黑暗之旅,可以去以下網址睇睇:
http://www.dialogue-experience.com.hk

沒有留言:

張貼留言